QULLCHANI UKJANA KATUNTANTANAKA KATUQT’APXANI

Foto: www.la-razon.com Llätunkani Chilina katuntatanaka 

Jichha urukamaxa khaya Chile markana —ina ch’usata katuntata jist’antata llätunka markachiri masinakasaxa niyawa antutmuchutaxapxani— sasawa Hector Arce irpirixa qhananchi. Kunaymana juchanakampi ina ch’usata k’arintata llätunkani jilatanakaxa, 100 uruwa uka marka Alto Ospicio sutini wati utana jist’antata t’aqhisiskapxi, ukhampachasa pasiri phachhanaxa antutmuchuñatakiwa qhananchawayapxäna, ukhamäñapatakixa —niya 50.000 $us ch’uxña qullqi paylañapawa— sapxarakitaynawa. Jichhaxa uka qullqixa wakicht’ayatapanxa, masurkamaxa janiwa churañjamäkataynati, jichhüruwa ukja qullqi marka masinakasa antutmuchxapxañapatakixa payllatäxani. Uka paylla katuqapxïpanxa marka masinakasaru katxasirinakaxa jank’akiwa antutmuchunxapxañapa. Ukhama sasaxa waljani irpirinakasawa qhananchapxaraki.

 

http://static.wixstatic.com

Ukhama arsutanaka phuqhasxipanxa Bolivia marka irpirinaka ukhamaraki katuntata wila masinakapampiwa Qullchani jisk’a markana katuqt’apxani. Ministro de Justicia Hector Arce irpirixa —wara uruwa marka masi jilatanakaxa markasa uraqiru purinxapxani— sataynawa. Jiwasa marka ministro irpirisaxa, Chile marka palla pallanakaxa –Pisiga markata apanisaxa Wara sutini wayq’ukamawa puriyanipxani– sataynawa. Niya Qullchani jisk’a markaru mantanxapxipana 9 marka masinakasaxa wali munasiña chuymampi katuqt’atäxapxchispa.

 

https://assets.metrolatam.com Katuntatanaka phamïllapawa

Chile markankiri arxatirinakampi irpirinakapampixa, —lunthata, jisk’achasirinaka ukhamaraki illapaña yänaka apt’atawa mantanipxi— sasawa k’arintapxatayna. Ukhama juchanaka apxatasaxa, kimsa mara jist’antaña amtapxatayna, uka amta jani phuqhañjamäpanxa —Chile alismuchutapxañapawa— sasina juchanchapxatayna. Janira markaparu kutt’asaxa 48,000 $us ch’uxña qullqi jaytawayapxañapatakiwa qhananchapxatayna. Bolivia marka awtunakampiwa contrabando apnaqirixa Chile markaru mantanipxi sasakiwa k’ari arunakampixa jisk’achapxatayna.

 

www.laprensa.com.bo Jupaxa Dr. Arce jilïriwa

Maysatuqitxa Rene Martinez, Ministerio de la Presidencia irpirixa, uka 9 marka masinakasaxa markasaru mantanipxani ukspachaxa markasa irpirinakawa katuqt’apxani, ukatxa wila masinakapampiwa jikisipxarakini.

Ukhama pani palla palla ukhamaraki paqallquni Aduana ukana irnaqirinakaxa achuqa phaxsi tunka llatunkani urukipanxa khaya qurpa uraqina katuntatapxatayna. Uka uruta jichha urukamaxa pataka uruxiwa, sasina irpirinakaxa qhananchapxi.

Aka yatiyaxa La Razon Digital 06/27/2017 ukana qhananchataru uñxatt’asa wakicht’ayatawa. (Qillqiri: Vitaliano Huanca Torrez).

Uñaraña

MARA T’AQA Andino Amazónico

225 DEL QUINTO SOL
Juta sariri pacha

Martha Gonzales  MAMA

Aymaranakatakixa, Pachaxa: jutsariri PACHAWA, (“jutaña-saraña”, “saraña-jutaña”). Jutsariri pachaxa, aka pachana inasa mä chiqata sartasina muytasa muytasa juta sarkaspa, ukhamawa amuyunxa.

Qallarasaxa, saräwipana janiwa tukuyanïkiti, janirakiwa mä mara sapakisa utjkarakiti, janirakiwa machaqäkisa mirq’ïkisa. Mäkipiri pachaxa, jaka jant’akuwa, jaka jant’akuxa chhijnuqa juta sariri pachawa, ukatawa qhipha nayra uñtasisa sarnaqaña, sasinasa saraktanxa.

 

Illimani willjta (FOTO:FLP)

Mara t’aqa phaxsina juta sariri pachaxa maya muyti, uka phaxsita kutjtani, ukjata yaqha maraxa qalltani, ukata mara t’aqa sata. Aka phaxsinxa, mä urunxa Inti Tataxa uraqi pachatxa sinti jayankiwa, inasa uraqi pachampi alaxa pachampixa t’aqaskaspa ukhamawa.

(FOTO: Martha Gonzales Cochi)

Ukampisa uka urunaki wasa ch’amaxa utjarakispa, wasa qamasasa, wasa ch’iwisa, ukata qutuchasiñasa suyañasa wakisi. ¿Kunataki? Jutiri willkana ajayupa katuqañataki, ajayupampi, qamasapampi ch’amanchasiñataki, ukhamïpana, Tata Intixa willjtankani ukjaxa, taqinisa taqi chuymampi katuqapxañäni, Jallalla sasina, munata jila kullakanaka.

Aurora de Isla del Sol (FOTO:FLP)

(Que las fuerzas y energías renovadoras del cosmos nos acompañen en este WILLKA KUTI, que los humanos seamos capaces de armonizar y relativizar estas fuerzas con aromas y sabores que deleiten al Cosmos siempre en la búsqueda del vivir bien. Muchas felicidades hermanas y hermanas) (Mama Martha Gonzales Cochi)

Uñaraña

ISLA QHANASKIYA - TIRASKA: Titi Qaqa quta manqhana yatxatawinaka

Pasiri tunka paqallquni sawaru uruna aka mara t’aqa phaxsina, pä waranqa tunka paqalquni maranxa, Tiraska markana, khaya Municipio Puerto Pérez ukana, mä tama, Boliviano-Belga, yatxatirinakawa quta manqharu yatxatiri mantawäpxatayna. Ukaxa Christophe Delarere ukhamaraki Marcial Medina uka amtawi irpirinakaxa, uka quta manqharu mantasa yatxatatanakaxa, uka markaru yatiyawäpxatayna.

Kunjamasa, kunjamänsa, kunasa utji, uka Isla Qhanaskiya Tiraska markanxa, ukanaka yatiyapxatayna. Uka yatxatatanakanxa, siwa: Qhanaskiya Isla ukaxa, khä waranqa mara nayra pachanxa, Tiwanaku wak’anakaru luqtañchaqächispana, ukhama amuyapxatayna. Ukaxa saña munarakiwa, kunja wwakiskirïtaynasa jakañatakixa uka qulläna qutachaqaxa, ukhama siwa.

Uka markankirinakaxa wali kusisitawa uka uru amtawayapxi. Juk’ampi ch’amanchata sarantaskañataki. Uka jikita yänakaxa aymara markana sarnaqawipa wali ch’amanchi, sapxiwa. Ukhamata khitïpxtansa, kunäpxañänisa uksa ch’amanchistani, sapxiwa. Uka quta manqharu manatasa jikinita yänakaxa, uka pä museo (arqueológico y etnográfico) ukaruwa, ch’amanchañapataki, uskutäni, sapxiwa.  Ukhamata uka markana turismo ukasa wali ch’amani sartañapataki.

Ukatsa, Tiraska ukhamaraki Municipio Puerto Pérez, ukanxa mä film (película documental) "Los Secretos Hundidos del Titicaca" uka uñjawayapxatayna. Ukaxa Isla del Sol, Titi Qaqa khaya araxtuqina, Q’uwa jach’a qutana lurapxatayna. (I. Callizaya - 2017)

Uñaraña

Wawanakaru kunjamasa yatichañäspa

Dr. Arun Gandhi akhama arst’atayna: Mä uruxa Durban (Sudáfrica) jisk’a markana qamkasaxa tatajampiwa yaqha jach’a markaru awtuta sarapxtha. Mamajaxa sitünwa: “markaru purisaxa manq’añanaka althapt’anïta”. Janch’a markara purxapxtha uka pachaxa tatajaxa sarakituwa: “nayaxa mä conferencia amuykipäwiruwa sart’ä.

Marti Canaviri

Ukhakamaxa jumaxa mikanikuru awtu uñjt’ayanïta. Ukata 5:00 jayp’uruwa akawjana jikisxañäni”.

Walikiwa, sawa, tatajaru sisthxa. Ukata mäkiwa mikanikuru awtu jaytanisina cine uñch’ukiri mantxtha. Ukana qharata 5:30 jayp’ukamawa uñch’ukxatäthxa. Janiwa phisqha jayp’uru, tatajaru suyañajäkäns uks akch’asa amtaskxatäthti. Cine manqhata t’ijsunisina, k’atakipuniwa awtu tallirata aptanisina, kawkhantï suyañajäkana, ukjaruwa purxtha. Tatajaxa llakitawa ukawjana suyaskatïtu.

–Kunatsa jichhaki purinta, sawa situxa; cinena uñch’ukiskayätha, saña axsarasinxa, sisthwa: “Awtuwa janira askichatäkänti, uka suyaskthxa”. Ukata tatajaxa situwa.

–Jumaru uywañana pantjasipunpachäthwa, jani ukhamäkaspaxa, chiqxaya arst’chismaxa.

FOTOS: Marti Canaviri

Kunanpunsa pantjaspachäthxa, uka yatiñatakixa kayuwa utakama sarä, sawa tatajaxa maya sartawayxi. Llaq’a qhiqanaka, ukhamaraki ch’amaka chiqanaka wali thayjata 29 kilómetros phisqha chikatani pachanaka (5 horas) wali t’aqisiñampi saräna. Uka uñjasaxa walpuni k’arisitajata chuymaja liq’isthxa, sasina: “janipuniwa mayampisa k’ariskxäti”.

Tatajaxa talliraru jawsataynawa. Jupatï aliqaki tuqxitaspäna ukjaxa k’arisiskakiriskäthwa. Kuntï yatichkitu ukxa masürusa luraskaspa ukhama jichhürkama amtaskthxa.  (Marti Canaviri jilatawa qillqt’atayna, nayawa (FLP) wukala phuqhacht’tha…)

Uñaraña

Janiwa nayra pachaxa jiwarayasiñasa uñisiñasa utjirïkataynati

Laq'a achachilanakasaxa taqi kunampisa qulläna uñkatt'asisa yanapt'asisa khuyapt'ayasisa sumana jakasipxirïtayna. Taqinisa pacharjama uñjasa thuqht'asipxirïtaynasa k'uchirt'asipxirïtaynasa, uywnakarusa pachaparjama qullunakarusa juyranakarusa pachaparjama yäqapxirïtyna. Jakawixa wali yäqatayrïtaynawa. Janiwa jachayasiñasa, jaqisa laq'usa juyrasa jachjasiriwa, siwa. Janiwa asut'isiñasa juyphintaspawa mach'aspawa, siwa. 

Jupaxa Yayiwaka Yayi Yanariku tata qillqt'iriwa

Janiwa umatsa manq'atsa jark'asiñäkiti, waxt'asiñawa, umawa apasiri mach'ayrïwa, siwa. Jaqi jiwayiriruxa ajayupawa irpxarusiri, siwa. 
Ch'axwanakasa, jaqipura jiwayasiñsa uñisisiñsa, mayniki jaqïña munañsa ispañula waxtita usllunakawa puriyanipxatayna. (Jichha urunakanxa sallqantasa ch'axwawa utjani sasa k'arintapxistuwa). Jallälla qulläna wiñaya jakawi!!!!!  (Yayiwaka Yayi Yanariku tatawa, qillqt’i)

Uñaraña